ვაშინგტონი, (Independence Avenue Media) — რუსეთი უკრაინის წინააღმდეგ ომს აგრძელებს. გასულ კვირაში, რუსულმა ძალებმა, ხარკივში, საბავშვო ბაღზე იერიში დრონებით მიიტანა. ამას წინ უსწრებდა აშშ-ის პრეზიდენტ დონალდ ტრამპის გადაწყვეტილება, რომლითაც ვლადიმირ პუტინთან ბუდაპეშტში დაგეგმილი სამიტი გაუქმდა. უკრანაში შეერთებული შტატების ყოფილი ელჩი, ჯონ ჰერბსტი მიიჩნევს, რომ მოვლენათა თანმიმდევრობა, ტრაგიკულად განმეორებად ხასიათს ატარებს.
„ამ დრომდე, [რუსეთის პრეზიდენტი ვლადიმირ] პუტინი, ყოველ კრიტიკულ მომენტში ახერხებდა დონალდ ტრამპის დარწმუნებას, მასზე ზეწოლა არ მოეხდინა. ასე მოხდა მაისში, როდესაც პრეზიდენტი ტრამპი და ევროპელი ლიდერები, თითქმის მზად იყვნენ რუსეთისთვის სანქციები დაეწესებინათ. იგივე მოხდა აგვისტოში. ბოლოს ახლახანს, [ოქტომბერში], როცა ვოლოდიმირ ზელენსკი ვაშინგტონში მოემგზავრებოდა, რათა მიეღო შეთანხმება, [გრძელი რადიუსის რაკეტების] „ტომაჰოუკების“ შესახებ, ეს მესამედ მოხდა“, – თქვა ჰერბსტმა „Independence Avenue Media”-სთან საუბრისას და ამ ინტერვიუს დასრულებიდან რამდენიმე საათში, მის ანალიზთან სრულ თანხვეედრაში, ზეწოლისა და უკან დახევის ციკლი, როგორც ჩანს გაგრძელდა.
ბუდაპეშტში დაგეგმილი პოტენციური სამიტი, რომელზე მუშაობაც ვაშინგტონში ზელენსკის ვიზიტამდე ერთი დღით ადრე, ტრამპსა და პუტინს შორის მოულოდნელი სატელეფონო საუბრის შედეგად დაიწყო — გაუქმდა. ამ გადაწყვეტილებიდან რამდენიმე საათში კი, თავისი მეორე საპრეზიდენტო ვადის განმავლობაში პირველად, დონალდ ტრამპმა, რუსეთის წინააღმდეგ მნიშვნელოვანი ახალი სანქციების დაწესების შესახებ გამოაცხადა. ვაშინგტონიოს სანქციები, რუსეთის ორ უმნიშვნელოვანეს ნავთობკომპანიას, „როსნეფტსა“ და „ლუკოილს“ ეხება.
